1. Ke tla o rorisa, Jehova, ka pelo ya ka yohle; ke tla bolela mehlolo ya hao kaofela.
2. Ke tla thaba, ke nyakallele wena. Ke tla binela lebitso la hao, Mookamedi ya phahameng!
3. Dira ho nna di suthela morao, di a thekesela, di timela pela hao!
4. Hobane o emela taba tsa ka le tokelo tsa ka; o dutse teroneng ya hao, o le moahlodi ya lokileng.
5. O kgalemela ditjhaba, o timetsa bakgopo, o hlakola lebitso la bona kamehla le mehla, ka ho sa yeng kae.
6. Ditshenyo tsa dira tsa ka di fedile ka ho sa feleng. O sentse metse ya bona, lebitso la bona le fedile hammoho le bona.
7. Empa Jehova o busa ka ho sa feleng; terone ya hae o e lokiseditse kahlolo;
8. o tla ahlola lefatshe ka ho loka, a neele ditjhaba dikahlolo tse lokileng.
9. Jehova ke setshabelo ho ya tujwang, setshabelo sa hae mehleng ya matswalo.
10. Ba tsebang lebitso la hao ba itshepisa ka wena; hobane wena, Jehova, ha o tlohele ba o batlang.
11. Binelang Jehova ya ahileng Sione; behelang ditjhaba diketso tsa hae tse phahameng;
12. hobane yena mophetetsi wa madi o a di hopola, hobane ha a lebale mohoweletso wa ba madimabe.
13. Nkgauhele, Jehova; bona bomadimabe boo ba ntlhoileng ba nkgatakelang ka bona, wena ya nnyollang menyakong ya lefu,
14. ke tle ke tumise dithoko tsa hao kaofela dikgorong tsa moradi wa Sione, ke thabele poloko ya hao!
15. Baditjhaba ba tebela lemeneng leo ba itjheketseng lona; maoto a bona a tshwaswa lerabeng leo ba le patileng.
16. Jehova o iponahaditse, o lokisitse; o tshwasa ya kgopo ketsong ya diatla tsa hae. (Higgaione. Sela.)
17. Bakgopo ba leba nqalong ya bafu, ho jwalo le ditjhaba kaofela tse lebetseng Modimo.
18. Hobane mofutsana a ke ke a lebalwa kamehla, mme tshepo ya ba madimabe e ke ke ya timela ka ho sa yena kae.
19. Tsoha, Jehova, hore motho a se ke a ipha matla, ditjhaba di tle di ahlolwe pela hao.
20. Jehova, sohlometsa botshabeho ba hao hara tsona, ditjhaba di tle di utlwe hoba ke batho feela! (Sela.)