1. Lona ba lokileng, le thabele Jehova! Thoko e tshwanela batho ba lokileng.
2. Rorisang Jehova ka harepa, le mminele ka thomo ya dikgole tse leshome!
3. Mmineleng sefela se setjha, lohlanang ka dikgoba, le utlwahatse diletsa tsa lona le mantswe a lona!
4. Hobane lentswe la Jehova le lokile, o tshepeha diketsong tsohle tsa hae.
5. O rata tokelo le ho loka; lefatshe le tletse mehauhelo ya Jehova.
6. Mahodimo a entswe ke lentswe la Jehova, le makgotla wohle a wona ke pudulo ya molomo wa hae.
7. O bokella metsi a lewatle hammoho, a ka qubu; o boloka bodiba dipolokelong tsa hae.
8. Lefatshe kaofela a le ke le tshabe Jehova! Baahi bohle ba lefatshe a ba ke ba thothomele pela hae!
9. Hobane, ha a bua, ho ye ho hlahe ntho; leha a laela, e ye e be teng.
10. Jehova o etsa merero ya batho ntho feela; o tshwephola mehopolo ya ditjhaba.
11. Merero ya Jehova e tiile ka ho sa feleng, mehopolo ya pelo ya hae e eme ka ho sa yeng kae.
12. Ho lehlohonolo setjhaba seo Jehova e leng Modimo wa sona, le batho bao a ikgethetseng bona ho ba lefa la hae!
13. Jehova o tadima a le lehodimong, o bona bara ba batho kaofela.
14. Nqalong ya bodulo ba hae o lemoha baahi ba lefatshe kaofela.
15. Ke yena ya bopileng dipelo tsa bona bohle, ya elang mesebetsi ya bona kaofela hloko.
16. Ha ho morena ya ka hlolang ka bongata ba makgotla a hae, ha ho mohale ya ka bolokehang ka boholo ba matla a hae.
17. Pere hase ntho e hlolang, motho a ke ke a phonyoha ka matla a yona.
18. Bonang, mahlo a Jehova a hodima ba mo tshabang, ba tshepang mohau wa hae,
19. ho holla meya ya bona lefung le ho ba phedisa mehleng ya tlala.
20. Meya ya rona e itshepetse Jehova: ke yena thuso ya rona le thebe ya rona.
21. Hobane pelo tsa rona di ithabela ho yena, hobane re tshepile lebitso la hae le halalelang.
22. Mohau wa hao, Jehova, a o be hodima rona, jwalokaha re itshepetse wena.