1. Modimo a o ke o tsohe, dira tsa wona di ke di qhalane, le ba o hloyang ba ke ba balehe pela wona!
2. O ba fiele jwaloka mosi o fielwang ke moya; jwaloka sehlotla sa dinotshi se qhibidihang pela mollo, ba bolotsana ba timele jwalo pela Modimo.
3. Empa ba lokileng ba tla thaba, ba be ba nyakalle pela Modimo, ba hlasimolohe, ba bine.
4. Binelang Modimo, le roke lebitso la wona! Batelletsang ya kaletseng lefeelleng tsela! Jehova ke lebitso la hae; itumeleng pela hae.
5. Ntata dikgutsana, moemedi wa bahlolohadi, ke Modimo moahong o halalelang wa wona.
6. Modimo o lokisetsa ba qhalaneng bodulo, o lokolla ba tshwerweng ho ba kenya naleng; empa bakwenehi ba ikahella naheng e tshehla.
7. Modimo, enere mohla o etellang setjhaba sa hao pele, ha o haola kahara lefeella, (Sela.)
8. lefatshe la reketla, mahodimo a ruthutha pela Modimo, le yona Sinai pela sefahleho sa Modimo, Modimo wa Iseraele.
9. Modimo wa nesa pula ya medupe, mme lefa la hao le kgathetseng wa le tiisa.
10. Phutheho ya hao ya ikahella teng; wa lokisetsa ya lesitsi mohau wa hao, Modimo!
11. Morena o utlwahatsa lentswe la hae; basadi ba tsebisang hlolo ke lekgotla le leholo, ba re:
12. Marena a ditjhaba a baleha, a baleha; mme basadi ba disang matlo ba arolelana kgapo.
13. Na le tla nne le phomole hara masaka? Mapheo a leeba a apesitswe ka silefera, le masiba a lona ka kgauta e tshehla.
14. Yare ha Ya matla wohle a qhalanya marena, naha ya nna ya sweufala jwaloka Tsalmone ha lehlwa le kgetheha.
15. Thaba tsa Modimo, thaba tsa Bashane, thaba tse dihlorohloro, thaba tsa Bashane,
16. na lona, dithaba tse dihloro, le honohellang thaba e kgethilweng ke Modimo ho aha teng na? E, Jehova o tla aha ho yona ka ho sa feleng.
17. Makoloi a Modimo a dikete tse mashome a mabedi, dikete le diketekete; morena o mahareng a wona; Sinai o sehalalelong.
18. O nyolohetse phahameng, o isitse batshwaruwa kgolehong, o nkile dineo ho batho le ho bona bakwenehi, hore Jehova Modimo a tle a tsebe ho aha teng.
19. Morena a ke a roriswe ka matsatsi wohle; o jara boima ba rona ka matsatsi wohle. (Sela.)
20. Modimo ho rona ke Modimo o bolokang; Jehova Morena o tseba ho ntsha lefung.
21. E, Modimo o tla bata hlooho ya bao e leng dira ho wona, lehata le sehlotho la ya itsamaelang dibeng tsa hae.
22. Morena o itse: Ke sa tla ba lata Bashane, ke ba late le bodibeng ba lewatle;
23. hore maoto a hao a hate mading, mme leleme la dintja tsa hao le abelwe ditopo tsa dira tsa hao.
24. Modimo, ba bone motsamao wa hao, motsamao wa Modimo wa ka, wa Morena wa ka sehalalelong.
25. Dibini di tsamaya sehloohong, ba letsang dithomo ba tla kamora tsona, mahareng a barwetsana ba teang meropa.
26. Ba re: Rorisang Modimo diphuthehong; le rorise Morena, lona ba tswang lesikeng la Iseraele!
27. Moo, ke Benjamine e monyenyane, mmusi wa bona; ke mahosana a Juda le makgotla a hae; ke mahosana a Sabulone, le mahosana a Nefthali.
28. Modimo wa hao a laetse hore o be le matla. Modimo, o tiise seo o se sebeditseng bakeng sa rona,
29. o le tempeleng ya hao, o okametse Jerusalema; marena a tla o tlisetsa dinyehelo tsa wona.
30. Kgalemela sebata se laletseng mahlakeng, le mohlape wa dipoho hammoho le manamane a ditjhaba tse hatakelang ditjhelete tsa silefera ka maoto. O qhalanye ditjhaba tse ratang ntwa.
31. Mahosana a tla tla, a etswa Egepeta; Ethiopia o tla phakisa a otlollele matsoho a hae ho Modimo!
32. Mebuso ya lefatshe, phahamisetsang ho Modimo difela tsa lona; le binele Morena dipesaleme! (Sela.)
33. Binelang ya haolang ka sebaka sa mahodimo a kamehla. Utlwang! o utlwahatsa lentswe la wona, lentswe le tlerolang.
34. Ereng: Matla ke a Modimo, oo boholo ba wona ba okamelang Iseraele, oo matla a wona a bonahalang marung.
35. Modimo, o a tshabeha o le sehalalelong sa hao! Ke Modimo wa Iseraele o neang setjhaba sa wona matla le borena. Modimo a o rokwe!