1. Rorisang Jehova, hobane ho hotle ho roka Modimo wa rona; e, ke ntho e monate; thoko e a mo tshwanela.
2. Jehova o tsosa Jerusalema, o bokella balelekwa ba Iseraele.
3. O fodisa ba pelo di hlabehileng, o tlamella maqeba a bona.
4. O lekanya palo ya dinaledi, o di rea mabitso kaofela.
5. Morena wa rona o moholo, matla a hae a maholo ka ho fetisisa; kutlwisiso ya hae ha e na ho lekanngwa.
6. Jehova o tsosa ba ikokobetsang, o kokobetsa ba babe ho isa fatshe.
7. Binelang Jehova diteboho, le roke Modimo wa rona ka harepa!
8. O thiba lehodimo ka maru, o lokisa pula ho na lefatsheng; o medisa jwang dithabeng;
9. o fa diphoofolo dijo tsa tsona, o fepa madinyane a makgwaba a llang.
10. Ha a re letho ka matla a pere, ha a kgahliswe ke maoto a motho.
11. Jehova o kgahliswa ke ba mo tshabang, ba itshepelang mohau wa hae.
12. Jerusalema, rorisa Jehova! Sione, o roke Modimo wa hao!
13. Hobane o tiisa mekwallo ya menyako ya hao, o hlohonolofatsa bara ba hao kahare ho wena.
14. O bea kgotso meeding ya hao, o o kgorisa ka moko wa koro.
15. O romela lefatshe taelo ya hae, lentswe la hae le tjhatjhametsa kapelepele.
16. O nesa lehlwa, le lesweu jwaloka boya ba nku; o hasa serame fatshe jwaloka molora;
17. o diha sefako sa hae se thata; ke mang ya ka tsebang ho ema pela dirame tsa hae?
18. O romela lentswe la hae, a di qhibidihise; o fokisa moya wa hae, metsi a phorosetse.
19. O senoletse Jakobo lentswe la hae, o neile Iseraele melao ya hae le dikahlolo tsa hae.
20. Ha a ka a etsa jwalo bakeng sa ditjhaba tse ding kaofela, mme ha di tsebe dikahlolo tsa hae. Bokang Jehova!