1. Rokang Jehova, hobane o molemo, etswe mohau wa hae o hlola ka ho sa feleng.
2. Iseraele a ke a re: Efela mohau wa hae o hlola ka ho sa feleng!
3. Ntlo ya Aarone e ke e re: Efela mohau wa hae o hlola ka ho sa feleng!
4. Ba tshabang Jehova ba ke ba re: Efela mohau wa hae o hlola ka ho sa feleng!
5. Ha ke ne ke le matswalong, ka rapela Jehova, mme Jehova a nkutlwa, a nketsetsa sebaka.
6. Jehova o nkemetse; ha ke tshabe letho, motho a ka nketsang?
7. Jehova o a nkemela, ke e mong wa ba nthusang, mme ba ntlhoyang ba tla thabisa mahlo a ka.
8. Ho balehela ho Jehova ke molemo o fetisang wa ho itshepela batho;
9. ho balehela ho Jehova ke molemo o fetisang wa ho itshepela marena.
10. Ditjhaba kaofela leha di ka mpokanela, ruri, ka lebitso la Jehova, ke tla di qhalanya!
11. Leha di ka mpokanela, ruri, ka lebitso la Jehova, ke tla di qhalanya!
12. Leha di ka mpokanela jwaloka dinotshi, di tla tingwa jwaloka mollo wa meutlwa. Ruri, ka lebitso la Jehova, ke tla di qhalanya.
13. O ratile ho nthapalatsa ka ho ntshusumetsa, empa Jehova e bile thuso ya ka.
14. Jehova ke matla a ka le pina ya ka; ebile ke yena poloko ya ka.
15. Mehoo ya dipina tsa hlolo le tsa topollo di duma ditenteng tsa ba lokileng, ba re: Letsoho le letona la Jehova le bonahaditse matla a lona;
16. letsoho le letona la Jehova le phahamile, letsoho le letona la Jehova le bonahaditse matla a lona.
17. Nke ke ka shwa, empa ke tla phela, ke bolele diketso tsa Jehova.
18. Jehova o ne a nkotle hathata; empa ha a ka a nneela lefu.
19. Mpuleleng menyako ya ho loka; ke tla kena ka yona, ke roke Jehova.
20. Ke wona monyako wa Jehova; ba lokileng ba tla kena ka wona.
21. Ke a o leboha, hobane o nkutlwile, e bile ke wena poloko ya ka.
22. Lejwe le lahlilweng ke bahahi, le fetohile lejwe la ntlha, la motheo.
23. Hoo ho entswe ke Jehova; ke mehlolo mahlong a rona.
24. Ke lona leo letsatsi le entsweng ke Jehova; a re thabeng, re be re nyakalle ka lona.
25. Oho Jehova, ke a o rapela, o boloke! Oho Jehova, ke a o rapela, o hlohonolofatse.
26. Ho hlohonolofale ya tlang ka lebitso la Jehova! Re a le hlohonolofatsa, rona ba ntlo ya Jehova.
27. Jehova ke Modimo, mme ke yena ya re bonesang. Tshwarang kgomo ya sehlabelo ka marapo, le e tlise manakeng a aletare!
28. O Modimo wa ka, ke o roka ke hona; o Modimo wa ka, ke a o rorisa.
29. Rokang Jehova, hobane o molemo, etswe mohau wa hae o hlola ka ho sa feleng.