1. Ke tla rorisa Jehova kamehla; thoko ya hae e tla ba molomong wa ka kamehla.
2. Moya wa ka o ithorise ka Jehova! Ba pelo di nolo a ba utlwe hoo, mme ba thabe!
3. Kopanang le nna ho tlotlisa Jehova; bohle, re hodiseng lebitso la hae hammoho.
4. Ka na ka batla Jehova, mme a nkaraba, a ba a mpholosa ho tshabeng ha ka kaofela.
5. Ya tadimang ho yena o a ediswa, dihlong ha di sa tla ba sefahlehong sa hae.
6. Mohlomohi ha a rapela, Jehova o a utlwa; o mo pholosa mahlomoleng a hae kaofela.
7. Lengeloi la Jehova le lara pela ba mo tshabang, le a ba boloka.
8. Latswang, le bone hoba Jehova o molemo! Ho lehlohonolo motho ya tshabelang ho yena!
9. Tshabang Jehova, lona bakgethwa ba hae, hobane ha ho letho le hlokwang ke ba mo tshabang.
10. Ditawana di ka hloka, tsa lapa; empa ba batlang Jehova ha ba haellwe ke molemo leha o le mong.
11. Tloong, lona bara ba ka, le mmamele; ke tla le ruta ho tshaba Jehova.
12. Leha o ka ba mang ya ratang ho phela, ya lakatsang dilemo ho ja lehlohonolo,
13. tshabisa leleme la hao bolotsana, o phemise melomo ya hao dipolelo tsa ho thetsa;
14. sesefa bobe, o etse botle; batla kgotso, o e latelle.
15. Mahlo a Jehova a ntse a tadimile ba lokileng, ditsebe tsa hae di bulehetse mehoo ya bona.
16. Sefahleho sa Jehova se tjamela ba bolotsana ho tlosa ho hopolwa ha bona lefatsheng.
17. Ba lokileng ha ba howa, Jehova o a ba utlwa, o ba imolla matswalong a bona kaofela.
18. Jehova o haufi le ba pelo tse robehileng, o thusa ba meya e teteditsweng.
19. Mahlomola a ya lokileng a mangata; empa Jehova o mo ntsha ho wona kaofela;
20. o boloka masapo a hae kaofela, ha ho le leng le robehang.
21. Bomadimabe bo tla bolaya ya bolotsana, mme bao e leng dira ho ya lokileng ba tla tsuwa.
22. Jehova o lopolla bophelo ba bahlanka ba hae; bohle ba mo tshepang ba ke ke ba tsuwa.