1. Boka Jehova, moya wa ka; tsohle tse ka ho nna a di ke di boke lebitso la hae le kgethehileng!
2. Boka Jehova, moya wa ka, o se ke wa lebala ditshitso tsohle tsa hae!
3. Ke yena ya tshwarelang makgopo a hao wohle, ya fodisang malwetse a hao kaofela.
4. O lopolla bophelo ba hao lebitleng, o o rwesa lereko le mehauhelo hloohong.
5. O kgorisa molomo wa hao ka tse molemo, mme botjha ba hao bo ntjhafala jwaloka ntsu.
6. Jehova o lokisetsa, o ahlolela bohle ba hatakelwang.
7. O ne a senolele Moshe ditsela tsa hae, a bontsha bana ba Iseraele diketso tsa hae tse phahamileng.
8. Jehova o mohau, o lereko, o dieha ho halefa, o ruile mehauhelo e mengata.
9. Ha a tsekise kamehla, hlonamo ya hae hase e sa feleng.
10. Ha a ka a re etsa kamoo dibe tsa rona di leng kateng, ha a ka a re putsa ka moputso wa makgopo a rona.
11. Empa jwaloka lehodimo ha le phahamile hodimo ho lefatshe, mohau wa hae o moholo jwalo ho ba mo tshabang.
12. Jwalokaha botjhabela bo le hole le bophirimela, o lahlela makgopo a rona jwalo hole le rona.
13. Jwalokaha ntata motho a hauhela bana ba hae, Jehova o hauhela jwalo ba mo tshabang.
14. Hobane o tsebisisa ho bopjwa ha rona, o elellwa hoba re lerole feela.
15. Motho, ditshiu tsa hae di jwaloka jwang; o kgaba jwaloka palesa ya naha;
16. ha moya o feta hodima yona, e se e le siyo, esita le tulo tsa yona ha di sa e tseba.
17. Empa mohau wa Jehova o hlola o le teng kamehla le mehla ho ba mo tshabang, le ho loka ha hae ho bana ba bana ba bona,
18. e leng ba bolokang selekane sa hae, ba elellwang ditaelo tsa hae ho di phetha.
19. Jehova o beile terone ya hae mahodimong, mme borena ba hae bo busa dintho tsohle.
20. Bokang Jehova, lona mangeloi a hae, bahale ba matla, ba phethang lentswe la hae, ba mamelang molomo wa hae!
21. Bokang Jehova, lona makgotla a hae kaofela, lona bahlanka ba hae kaofela, ba etsang ho ratwang ke yena!
22. Bokang Jehova, lona mesebetsi ya hae kaofela, nqalong tsohle tsa borena ba hae! Moya wa ka, o boke Jehova!