1. Yare hobane Isaaka a tsofale, mme mahlo a hae a sitwe ho bona, a bitsa Esau, mora wa hae e moholo, a re ho yena: Mora ka! A re: Ke nna enwa.
2. Isaaka a re: Bona hle, ke tsofetse, mme ha ke tsebe letsatsi leo ke tlang ho shwa ka lona.
3. Ka baka leo, ako nke jwale dibetsa tsa hao, kgohlopo ya hao le seqha sa hao, o ye naheng, o ntsomele phoofolo;
4. o nketsetse nama e hlabosang, eo ke e ratang, o ntlisetse yona, ke je, moya wa ka o tle o o hlohonolofatse, ke eso ho shwe.
5. Kanthe Rebeka o ne a ntse a utlwa ha Isaaka a bolella Esau, mora hae. Yaba Esau o ya naheng ho ya tsoma phoofolo eo a tlang ho e tlisa.
6. Yaba Rebeka o bua le Jakobo, mora hae, a re: Bona, ke utlwile ntatao a bolella Esau, ngwaneno, a re:
7. Ako ntlisetse phoofolo, o nkapehele nama e hlabosang, ke tle ke e je, mme ke o hlohonolofatse pela Jehova, ke eso ho shwe.
8. Jwale, mora wa me, mamela lentswe la ka kamoo ke tlang ho o laela kateng.
9. Eya mohlapeng, o ntshwarele teng dipotsanyane tse pedi tse ntle, mme ke tla lokisetsa ntatao nama, e hlabosang ka tsona, kamoo a e ratang kateng.
10. O tla e isa ho ntatao a tle a e je, a o hlohonolofatse, a eso ho shwe.
11. Yaba Jakobo o re ho Rebeka, mmae: Bona, Esau, ngwaneso, ke motho ya mohwete, nna ke motho ya lehwete.
12. Ekaba ntate o tla mphopholetsa, mme ke tla ba ho yena jwaloka mothetsi, ke tlise thohako hodima ka, e seng lehlohonolo.
13. Mmae a re ho yena: Thohako e ka tlang ho wena a e be hodima ka, mora wa me; wena empa, mamela lentswe la me, o tsamaye, o ntshwarele tsona.
14. Yaba o a ya, a di nka, a di tlisa ho mmae, mme mmae a apeha nama e hlabosang, kamoo ntatae a e ratang kateng.
15. Rebeka a ba a nka diaparo tse ntle tsa Esau, mora wa hae wa letsibolo, tse leng ho yena ka tlung, a apesa Jakobo mora wa hae e monyenyane, ka tsona.
16. A apesa matsoho a hae le moo ho leng lehwete molaleng wa hae, ka matlalo a dipotsanyane.
17. A bea nama e hlabosang le bohobe boo a bo apehileng diatleng tsa Jakobo, mora hae.
18. Yaba o ya ho ntatae, a re: Ntate! A re: Ke nna enwa; o mang, mora ka?
19. Jakobo a re ho ntatae: Ke nna Esau, letsibolo la hao; ke entse kamoo o ntaetseng kateng; tsoha he, o dule, o je se tsomilweng ke nna, moya wa hao o tle o ntlhohonolofatse.
20. Isaaka a re ho mora hae: O phakisitse hakaakang ho se fumana, mora wa ka! A re: Ke hoba Jehova, Modimo wa hao, a se tlisitse pela ka.
21. Isaaka a re ho Jakobo: Ako atamele, ke o phopholetse, mora wa ka, ke tle ke tsebe hore na o fela o le mora wa ka Esau, kapa ha o yena.
22. Yaba Jakobo o atamela Isaaka, ntatae, mme eo a mo phopholetsa, a re: Lentswe ke lentswe la Jakobo, empa matsoho ke matsoho a Esau.
23. Ha a ka a mo lemoha, hobane matsoho a hae a ne a le mohwete jwaloka matsoho a Esau, moholwane wa hae; yaba o a mo hlohonolofatsa,
24. a re: A o fela o le mora wa ka Esau na? A re: Ke yena.
25. Yaba o re: Ntlisetse, ke je se tsomilweng ke mora wa ka, mme moya wa ka o o hlohonolofatse. Jwale a mo tlisetsa, mme a ja; a ba a mo tlisetsa veine, a nwa.
26. Isaaka, ntatae, a re ho yena: Atamela jwale, o nkake, mora wa ka.
27. Yaba o atamela, a mo aka. Isaaka a utlwa monko wa diaparo tsa hae, a mo hlohonolofatsa, a re: Bona, monko wa mora wa ka o jwaloka monko wa tshimo eo Jehova a e hlohonolofaditseng!
28. Modimo o ke o o fe phoka ya lehodimo le lefura la lefatshe, le nala ya koro le ya veine!
29. Ditjhaba di ke di o sebeletse, merabe e iname tlasa hao! O be morena wa banabeno, mme bara ba mmao ba iname pela hao! Ho rohakwe ya o rohakang, mme ho hlohonolofatswe ya o hlohonolofatsang!
30. Yare Isaaka ha a sa tswa qeta ho hlohonolofatsa Jakobo, mme Jakobo a sa tswa tswa pontsheng ya Isaaka, ntatae, Esau, moholwane wa hae, a fihla a etswa tsholong.
31. Le yena a lokisa nama e hlabosang, a e tlisa ho ntatae, a re ho ntatae: Ntate a ke a tsohe, a je se tsomilweng ke mora hae, hore moya wa hao o ntlhohonolofatse.
32. Isaaka, ntatae, a re ho yena: o mang na? A re: Ke nna Esau, mora wa hao wa letsibolo.
33. Yaba Isaaka o a nyaroha, a tshoha haholo ka ho fetisisa, a re: Ke mang ya tsomileng phoofolo, a e tlisa ho nna, mme ka ja tsohle o eso ho tle, ka ba ka mo hlohonolofatsa, mme o tla fela a hlohonolofale?
34. Yare ha Esau a utlwa mantswe a ntatae, a meketsa ka lentswe le leholo le bohloko ka ho fetisisa, a re ho ntatae: Oho, ntlhohonolofatse le nna, ntate!
35. A re: Moenao o tlile ka mano, o inketse lehlohonolo la hao.
36. A re: Na ha a rewa lebitso la Jakobo? Ke enwa, o nthetsitse habedi: o nkamohile boholwane ba ka, mme bona, le jwale o nkamohile lehlohonolo la ka! A eketsa a re: Na ha o a ka wa mpolokela lehlohonolo na?
37. Isaaka a arabela Esau, a re: Bona, ke mo entse morena wa hao, mme ke mo neile banababo kaofela hore e be bahlanka ba hae; ke bile ke mo babaletse le ka koro le veine; mme jwale wena, nka o neang, mora wa ka?
38. Esau a re ho ntatae: A ke yona hlohonolofatso ya hao e nnotshi, ntate? Oho, ntlhohonolofatse le nna, ntate! Yaba Esau o phahamisa lentswe la hae, a lla.
39. Isaaka, ntatae, a mo arabela, a re ho yena: Bona, moaho wa hao o tla hloka lefura la lefatshe, le phoka ya lehodimo e tswang hodimo.
40. empa o tla phela ka lerumo la hao, o sebeletse moenao; etlare ha o etsa ka matla, o tla roba joko ya hae, o e kwele molaleng wa hao.
41. Esau a hloya Jakobo ka baka la hlohonolofatso eo ntatae a mo hlohonolofaditseng ka yona, mme Esau a re ka pelong ya hae: Ditshiu tsa bofifi ba ntate di haufi, ke tla bolaya moena ka, Jakobo.
42. Rebeka a sebelwa polelo ya Esau mora wa hae e moholo; yaba o romela, a bitsa Jakobo, mora wa hae e monyenyane, a re ho yena: Bona, Esau, moholwane wa hao, o rata ho iphetetsa ka wena ka ho o bolaya.
43. Jwale, mora wa ka, mamela lentswe la ka: o tlohe, o ipalehele Harane ho kgaitsedi ya ka, Labane;
44. o hlole ditshiu tse ding ha hae, ho fihlela ho befelwa ha moholwane wa hao ho ba ho kokobela;
45. mme etlare ha bohale ba moholwane wa hao bo o tlohela, mme a lebala seo o mo entseng sona, ke hona ke tla romela ho o lata. Nka timellwa jwang ke lona ba babedi ka tsatsi le le leng?
46. Rebeka a re ho Isaaka: Ke tennwe ke ho phela ha ka ka baka la baradi ba Hethe; ekare ha Jakobo a ka inkela mosadi ho baradi ba Hethe, ya jwaloka barwetsana ba naha ena, na bophelo ba ka e tla ba bo jwang?