1. Elellwa kgwedi ya Abibe, mme o etsetse Jehova, Modimo wa hao, Paseka ka yona; hobane ke ka kgwedi ya Abibe, Jehova, Modimo wa hao, a o ntshitseng naheng ya Egepeta bosiu.
2. O tla hlabela Jehova, Modimo wa hao, Paseka, o mo hlabele dikgomo le dinku tsa hao, nqalong eo Jehova a tla e kgetha ho bea lebitso la hae ho yona.
3. O se ke wa jellela Paseka le bohobe bo lomositsweng; ka matsatsi a supileng, o je mahobe a sa lomoswang, mahobe a mahlomola; kahobane o tswile naheng ya Egepeta ka potlako; o tle o hopole ka matsatsi wohle a ho phela ha hao letsatsi leo o tswileng naheng ya Egepeta ka lona.
4. Ka matsatsi a supileng ho se ke ha bonwa ditomoso ha hao, naheng yohle ya hao; haele nama ya sehlabelo seo o se etsang ka mantsiboya a letsatsi la pele, e ka kgona ho se ke ha salla hosanane letho.
5. O se ke wa hlaba Paseka ho ofe kapa ofe wa metse ya hao, eo Jehova, Modimo wa hao, a o neang yona;
6. e mpe e be nqalong eo Jehova, Modimo wa hao, a tla e kgetha ho bea lebitso la hae ho yona; ke hona moo o tla hlaba Paseka, mantsiboya ha letsatsi le dikela, nakong e jwaloka eo o tswileng Egepeta ka yona.
7. O tla e apeha, o e je nqalong eo Jehova, Modimo wa hao, a tla e kgetha, mme hosasane o kgutle, o boele ditenteng tsa hao.
8. Ka matsatsi a tsheletseng, o je bohobe bo sa lomoswang; haele letsatsi la bosupa ke la phutheho e kgolo ya Jehova, Modimo wa hao; o se ke wa etsa mosebetsi leha o le mong ka lona.
9. O tla bala diveke tse supileng, o qale ho bala diveke tse supileng hona ka nako eo o kenyang sekele korong ya hao ka yona;
10. mme o etsetse Jehova, Modimo wa hao, mokete wa Diveke, o abele Modimo kabelo kamoo matsoho a hao a ratang ho leboha kateng, o nee ho seo Jehova, Modimo wa hao, a o hlohonolofaditseng ka sona.
11. O thabe pela Jehova, Modimo wa hao, wena, le mora wa hao, le moradi wa hao, le mohlanka wa hao e motona, le e motshehadi, le Molevi ya menyakong ya hao, le moditjhaba, le kgutsana, le mosadi wa mohlolohadi ya leng ha eno, nqalong eo Jehova, Modimo wa hao, a tla e kgetha ho bea lebitso la hae ho yona.
12. O tla hopola hobane o bile mofo Egepeta, o boloke melao eo, mme o etse ka yona.
13. Ha o se o bokeletse hae tsa diotlo le tsa dihatelo tsa hao, o tla etsa mokete wa metlotlwane ka matsatsi a supileng.
14. Mokete oo wa hao o thabelwe ke wena, le ke mora wa hao, le ke moradi wa hao, le mohlanka wa hao e motona, le e motshehadi, le Molevi, le moditjhaba, le kgutsana, le mosadi wa mohlolohadi, ba ahileng menyakong ya hao.
15. Etsetsa Jehova, Modimo wa hao, mokete wa matsatsi a supileng, nqalong eo Jehova a tla e kgetha; hobane Jehova, Modimo wa hao, o tla o hlohonolofatsa kotulong yohle ya hao, le mesebetsing yohle ya matsoho a hao; mme o tla thaba kannete.
16. Hararo ka selemo, ba batona bohle ba heno ba tla itlhahisa pela Jehova, Modimo wa hao, nqalong eo a tla e kgetha, mohla mokete wa mahobe a sa lomoswang, le mohla mokete wa Diveke, le mohla mokete wa Metlotlwane: ba se ke ba itlhahisa pela Jehova ba le feela;
17. ba mpe ba tle, e mong le e mong ka mpho ya matsoho a hae, le kamoo Jehova, Modimo wa hao, a o hlohonolofaditseng kateng.
18. Bea baahlodi le dihlooho metseng yohle ya hao, eo Jehova, Modimo wa hao, a o neang yona melokong ya hao, ba tle ba ahlole setjhaba ka kahlolo ya ho loka.
19. O se ke wa fapoha ho loka, mme o se ke wa ya ka tshobotsi ya batho; o se ke wa amohela dimpho; hobane mpho e foufatsa mahlo a ba bohlale, mme e kgopamisa dipolelo tsa ba lokileng.
20. O ye ka ho lokileng ruri, o tle o phele, mme o rue lefatshe leo Jehova, Modimo wa hao, a o neang lona.
21. O se ke wa hloma diashera tsa sefate sefe le sefe pela aletare ya Jehova, Modimo wa hao, eo o tla iketsetsa yona.
22. Leha e le setshwantsho, o se ke wa iketsetsa sona, hobane Jehova, Modimo wa hao, o hloile ntho tseo.