4. Molala wa hao o jwaloka tora ya Davida e haheletsweng polokelo ya dibetsa; dithebe tse sekete di fanyehilwe teng, thebe tsohle tsa diqhenqha.
5. Matswele a hao eka mafahlana a tshephe, a fulanga hara mehaladitwe.
6. Ha ho ntse ho lebeletswe ho phola ha letsatsi le paleho ya meriti, ke tla ya thabeng ya mirra le thoteng ya dibano.
7. Thatohatsi ya ka, botle ba hao bo phethehile, ha ho sekodi ho wena.
8. Molebeletswa wa ka, tloha Lebanone le nna, o eme, o tadime o le hlorong ya Amana, hlorong ya Senire le Hermone, matsabeng a ditau, dithabeng tsa mangau!
9. O hapile pelo ya ka, ngwaneso, molebeletswa wa ka, o hapile pelo ya ka ka tjhadimo e le nngwe ya mahlo a hao, ka serwalo se le seng sa molala wa hao.
10. Kgahliso e kakang leratong la hao, ngwaneso, molebeletswa wa ka! Lerato la hao le monate ho fetisa veine hakakang; monko wa menkwane ya hao o fetisa wa menkwane e meng kaofela.
11. Melomo ya hao, molebeletswa wa ka, e rotha dinotshi; dinotshi le lebese di katlasa leleme la hao; monko wa diaparo tsa hao eka monko wa Lebanone.
12. Ngwaneso, molebeletswa wa ka, o tshimo e haheleditsweng, sediba se sireleditsweng, le mohlodi o tiisitsweng.
13. Mahlomela a hao ke tshimo ya difate tsa kharanata tse ditholwana tse monate, le dikiprese le dinareda.
14. Ke nareda le saforane, le kalamuse le sinnamone, le difate tsohle tse tswang menkwane, mirra le alwe, le tse fetisang tsohle hara dinonetso.
15. O mohlodi wa dirapa, sediba se metsi a kwellang, melapo e phallang e tswang Lebanone.
16. Moya wa leboya, tsoha; tloo le wena, moya wa borwa, o fokele serapeng sa me; dinonetso tsa sona di ntshe monko wa tsona! Moratuwa wa me a ke a kene serapeng sa hae, a latswe ditholwana tse monate tsa sona.