1. Ekare ha motho a rata ho hlahisetsa Jehova nyehelo, nyehelo ya hae a e be ya lefi la phofo; o tla le tshela ka ole, a le nonetse ka dibano.
2. O tla le isa ho baprista, bara ba Aarone; moprista o tla qotsa ho lona lefi la phofo le tshetsweng ka ole ka seatla, le dibano kaofela, mme moprista o tla di tjhesa aletareng, e be kgopotso aletareng, e le sehlabelo se tjhesitsweng ka mollo, se monko o monate ho Jehova.
3. Se setseng sa nyehelo eo e tla ba sa Aarone le bara ba hae; ke kabelo e halalelang haholo hara mahlabelo a tjheseditsweng Jehova.
4. Ekare ha o rata ho hlahisa nyehelo ya tse apehwang seboping, a e ke e be dinkgwa tse se nang ditomoso, tsa lefi la phofo tse dubilweng ka ole, le maqebekwane a sa lomoswang, a tlotsitsweng ka ole.
5. Ha nyehelo ya hao e le ya tse apehwang paneng, a e ke e be ya lefi la phofo e sa lomoswang, e dubilweng ka ole.
6. O e kume, mme o tshele ole hodima yona: ke nyehelo.
7. Ekare ha nyehelo ya hao e le ya tse apehwang pitseng, e tla etswa ka lefi la phofo le apehilweng ka ole.
8. O tla isa nyehelo ya ntho tseo ho Jehova, mme e tla hlahiswa ho moprista ya tla e tlisa pela aletare.
9. Moprista o tla ngwatha nyehelong se tshwanetseng ho ba kgopotso, a se tjhese aletareng: ke sehlabelo se tjhesitsweng ka mollo, se monko o monate ho Jehova.
10. Se setseng nyehelong eo e tla ba sa Aarone le bara ba hae; ke kabelo e halalelang haholo hara mahlabelo a tjheseditsweng Jehova.
11. Leha le hlahisetsa Jehova nyehelo efe le efe, e se ke ya etswa ka ditomoso, hobane le ke ke la tjhesetsa Jehova nyehelo ya setjheso e nang le ditomoso, leha e le dinotshi.
12. Le ka nyehella Jehova ka tsona dinyehelong tsa lona tsa dilopotsiya; empa di se ke tsa hlahiswa aletareng jwaloka monko o monate.
13. O tla noka ka letswai nyehelo tsohle tseo o di hlahisang; o ke ke wa lebala le ka mohla o le mong letswai la selekane sa Modimo wa hao nyehelong ya hao; o tla kenya letswai nyehelong e nngwe le e nngwe eo o e hlahisang.
14. Ekare ha o rata ho etsetsa Jehova nyehelo ya dilopotsiya, o tla hlahisa diqwapi tse qalang ho butswa, tse besitsweng mollong, dihlaku tse hohlilweng, e be nyehelo ya dilopotsiya tsa hao;
15. o tla di tshela ka ole, o di nonetse ka dibano: ke nyehelo.
16. Moprista o tla tjhesa karolo ya kgopotso ya dihlaku tse hohlilweng, le ya ole le dibano kaofela: ke nyehelo e tjheseditsweng Jehova.