6. Ba araba, ba re: Ha re nwe veine, hobane Jonadabe, mora Rekabe, ntata rona moholo, o ne a re laele, a re: Le se ke la nwa veine, lona le bana ba lona ka ho sa feleng.
7. Le se ke la haha matlo, le se ke la jala dijalo, le se ke la hloma masimo a merara, leha e le ho a rua, le mpe le nne le dule ditenteng ka ditshiu tsohle tsa lona, hore le tle le phele ditshiu tse ngata lefatsheng leo le ahellang ho lona.
8. Re entse ka lentswe la Jonadabe, mora Rekabe, ntata rona moholo, dinthong tsohle tseo a re laetseng tsona, ha a itse, re se ke ra nwa veine ka ditshiu tsohle tsa rona, rona le basadi ba rona, le bara ba rona, le baradi ba rona;
9. re se ke ra haha matlo ho itulela teng, re se be le tshimo ya merara, le ha e le tshimo le nngwe, leha e le dijalo.
10. Re nnile ra dula ditenteng, mme re utlwile, re bile re entse tsohle tseo Jonadabe, ntata rona moholo, a re laetseng tsona.
11. Empa enere ha Nebukadresare, morena wa Babilona, a futuhela lefatshe lena, ra ba ra re: Tloong, re keneng Jerusalema, re tloheng pela makgotla a Bakalde le pela makgotla a Basiria; yaba ke moo re ahileng Jerusalema.
12. Lentswe la Jehova la tla ho Jeremia, la re:
13. Ho itswe ke Jehova wa makgotla, Modimo wa Iseraele: Eya, o bolelle batho ba Juda le baahi ba Jerusalema, o re: Na le ke ke la amohela thuto, le tle le utlwe mantswe a ka na? Ho bolela Jehova.
14. Ho ntse ho bolokwa mantswe a Jonadabe, mora Rekabe, ao a kileng a laela bara ba hae ka wona hore ba se ke ba enwa veine, mme ha ba e nwe le kajeno, hobane ba ntse ba utlwa taelo ya ntata bona moholo. Mme nna nkile ka nna ka bua le lona, ke bua ke ntse ke tsoha e sa le hosasasasa; le mpa le sa ka le nkutlwa.
15. Nkile ka le romela bahlanka ba ka kaofela, baporofeta, ke ntse ke tsoha e sa le hosasasasa, ke ba roma, ke re: Bakang hle e mong le e mong mekgweng ya hae e mebe, le sokolohe diketsong tsa lona, le se ke la tsamaela medimo esele ho e sebeletsa, mme le tla nne le ikahele lefatsheng leo nkileng ka le nea lona le bontata lona moholo; empa ha le a ka la sekeha tsebe, ha le a ka la nkutlwa.
16. Athe bara ba Jonadabe, mora Rekabe, ba nnile ba boloka taelo ya ntata bona moholo, eo a ba laetseng yona; empa setjhaba sena ha se a ka sa nkutlwa.
17. Ka baka leo, ho itswe ke Jehova, Modimo wa makgotla, Modimo wa Iseraele: Bonang, ke ya hlahisetsa Juda le baahi bohle ba Jerusalema bobe bohle boo ke bo boletseng bakeng sa bona, kahobane nkile ka bua le bona, mme ha ba ka ba utlwa; nkile ka ba bitsa, mme ha ba ka ba araba.
18. Haele ntlo ya bana ba Rekabe, Jeremia a ba bolella, a re: Ho itswe ke Jehova wa makgotla, Modimo wa Iseraele: Erekaha le utlwile taelo ya Jonadabe, ntata lona moholo, mme le bolokile ditaelo tsa hae kaofela, mme le entse hohle hoo a neng a le laetse hona;
19. ka baka leo, ho itswe ke Jehova, Modimo wa Iseraele: Ho ke ke ha hlokeha motho wa Jonadabe, mora Rekabe, ya emang pela ka le ka mohla o le mong.