7. Matswalong a ka, ka bitsa ho Jehova, ka hoeletsa ho Modimo wa ka. A utlwa lentswe la ka a le sehalalelong sa hae, mme mohoweletso wa ka wa finyella ditsebeng tsa hae.
8. Teng, lefatshe la reketla, la thothomela; metheo ya mahodimo ya keqa, ya sisinyeha, kahobane a ne a halefile.
9. Ha nyoloha mosi dinkong tsa hae, le mollo o timeletsang molomong wa hae; a phutsa mashala a hlenneng.
10. A namisa lehodimo, a theoha; lefifi le letenya le ne le le tlasa maoto a hae.
11. A kalla kerubime, a fofa; a bonwa a fofa ka dipheo tsa moya;
12. a ikgurumetsa ka lefifi, a ikopa ka maqhubu a metsi le ka maru a matsho.