5. Yaba Retsine, morena wa Siria, le Peka mora Remalia, morena wa Iseraele, ba futuhela Jerusalema, ba thibella Akase teng, ba mpa ba sitwa ho mo hlola.
6. Ebile moo Retsine, morena wa Siria, a boelang a hapela Siria Elathe, a leleka Bajuda Elathe, mme Basiria ba tla Elathe, ba aha teng ho fihlela kajeno.
7. Ebile Akase o romela manqosa ho Tiglathe-Pilesere, morena wa Assiria, a re: Ke mohlanka wa hao le mora hao; tloo, o nnamolele matsohong a morena wa Siria le matsohong a morena wa Iseraele, ba ntsohetseng matla.
8. Akase a nka silefera le kgauta tseo a di fumaneng ka tlung ya Jehova le bobolokelong ba ntlo ya marena, a di romela ho morena wa Assiria ka mokgwa wa nyehelo.
9. Morena wa Assiria a mo utlwa; morena wa Assiria a fela a futuhela Damaseka, a o kena, mme a isa ba teng Kire kgolehong, a bolaya le Retsine.
10. Morena Akase a ya Damaseka, a tle a kopane le Tiglathe-Pilesere, morena wa Assiria, a bona aletare e Damaseka; yaba morena Akase o romela ho moprista Uria setshwantsho sa aletare le mokgwa wohle oo e entsweng ka wona.
11. Moprista Uria a haha aletare ka mokgwa wohle oo morena Akase a mo rometseng wona a le Damaseka; mme moprista Uria a e phetha, morena Akase a eso ho kgutle Damaseka.
12. Morena, ha a kgutlile Damaseka, a bona aletare; mme morena a atamela pela aletare, a hlaba mahlabelo hodima yona.
13. A tjhesa setjheso sa hae le nyehelo ya hae, a tshollela le ditshelo tsa hae teng, mme a fafatsa aletare ka madi a mahlabelo a hae, a teboho.
14. Le aletare ya koporo e pela Jehova, a e tlosa pela ntlo tulong tsa yona, dipakeng tsa aletare le ntlo ya Jehova, a e bea nqa leboya ho aletare.
15. Yaba morena Akase o laela moprista Uria, a re: Tjhesa setjheso sa hosasa aletareng e kgolo le nyehelo ya mantsiboya, le setjheso sa morena le nyehelo ya hae, le setjheso sa setjhaba sohle sa lefatshe, le nyehelo ya sona, le ditshelo tsa sona; o e fafatse ka madi a ditjheso le ka madi wohle a mahlabelo. Haele aletare ya koporo, ke tla e hopolela.
16. Moprista Uria a etsa ka tsohle tseo morena Akase a mo laetseng tsona.
17. Jwale, morena Akase a bolaya mahlakore a didulwana, a tlosa merifi e hodima tsona; a theosa le letsha kgomong tsa koporo tse tlasa lona, a le bea hodima sebotoboto sa majwe.
18. Le mathule a kwahetsweng a Sabatha a hahilweng ka tlung, le monyako wa morena o kantle, a di fetola ka tlung ya Jehova, ka baka la morena wa Assiria.
19. Haele taba tse ding tseo Akase a di entseng, ha ke re, di ngodilwe bukeng ya ditaba tsa ho phela ha marena a Juda?
20. Akase a ntoo orohela ho bontatae, a patwa ho bontatae motseng wa Davida; mme Esekiase, mora hae, ya eba morena tulong tsa hae.