1. Manasse o ne a le dilemo tse leshome le metso e mmedi, ha a qala ho busa, a busa ka dilemo tse mashome a mahlano a metso e mehlano Jerusalema.
2. A etsa ho leng hobe mahlong a Jehova, a ya ka manyala a ditjhaba tse neng di faladitswe ke Jehova pela bana ba Iseraele.
3. A boela a tsosa dinqalo tse diphahameng tse neng di qhaqhilwe ke Esekiase ntatae; a hahela boBaale dialetare, a etsa le diashera; a kgumamela makgotla wohle a lehodimo, a a sebeletsa.
4. A haha dialetare le ka tlung ya Jehova, eo Jehova a neng a e boletse, ka ho re: Lebitso la ka le tla ba Jerusalema ka ho sa feleng.
5. A hahela le makgotla wohle a lehodimo dialetare mabaleng a mabedi a ntlo ya Jehova.
6. A tjhesa le bara ba hae ka mollo kgohlong ya bana ba Hinnome, mme a etsa bonohe, le bolao, le boloi, a bea ba bitsang bafu, le dinohe; a nna a etsa tsohle tse mpe mahlong a Jehova, ho mo halefisa ka tsona.
7. Hape, a emisa setshwantsho se betlilweng, setshwantsho se entsweng ke yena, ka tlung ya Modimo, eo Modimo o neng o e boleletse Davida le Salomone, mora hae, ka ho re: Ke tla bea lebitso la ka ka ho sa feleng ka tlung ena, le motseng wa Jerusalema oo ke o kgethileng melokong yohle ya Iseraele;