5. ba karolo e nngwe ya boraro ba tla ema ka tlung ya morena, ba karolo e nngwe ya boraro ba ene pela monyako wa Jesode; setjhaba sohle sona se tla ema mabaleng a ntlo ya Jehova.
6. Ho se ke ha kena motho tlung ya Jehova, haese baprista, le Balevi ba tshwereng tshebetso; bona ba ka kena, etswe ba halalehile, mme setjhaba sohle se tla lebela Jehova.
7. Balevi ba tla teela morena hare ka nqa tsohle, e mong le e mong a tshwere dihlomo tsa hae ka letsoho la hae; mang le mang ya kenang ka tlung a ke a bolawe; le latelle morena ha a kena, leha a etswa.
8. Balevi le Bajuda kaofela ba etsa ka tsohle tse laetsweng ke moprista Jehojada; ba nka e mong le e mong banna ba hae ba tshwanetseng ho kena tshebeletsong ka Sabatha, hammoho le ba tswang ka Sabatha; hobane moprista Jehojada a ne a sa ka a kgutlisa dihlopha tse tswang.
9. Moprista Jehojada a nea balaodi ba makgolo marumo le mekoko le dithebe tsa morena Davida, tse leng ka tlung ya Modimo.
10. A emisa setjhaba, e mong le e mong a tshwere lerumo ka letsoho, ho qala nqeng ya le letona ho ntlo, ho isa nqeng ya le letshehadi ho ntlo, mabapa le aletare le ntlo, ba teetse morena hare.
11. Ba tlisa mora morena, ba mo rwesa moqhaka le bopaki, ba mmea morena, mme Jehojada le bara ba hae ba mo tlotsa, ba re: Ha ho phele morena!
12. Eitse ha Athalia a utlwa ditlatse tsa batho ba phalletseng ho tla rorisa morena, a tla hara setjhaba, ka tlung ya Jehova.
13. Ha a tadima, a bona morena, a ema pela tshiya ya hae, monyako, le mahosana le ba letsang diterompeta ba eme pela morena, setjhaba sohle sa naha se thabile, ho letswa diterompeta, mme dibini di tsamaisa dithoko ka diletsa. Yaba Athalia o hahola diaparo tsa hae, a re: Jo! phetohelo! phetohelo!
14. Yaba moprista Jehojada o laela balaodi ba makgolo, e leng balaodi ba makgotla, a re ho bona: Mo ntsheng diemeng, mme mang le mang ya mo latelang a bolawe ka lerumo; hobane moprista o ne a itse: Le se ke la mmolaela tlung ya Jehova.
15. Ba mo suthela tsela, a kgutlisetswa tlung ya morena, ka tsela ya monyako wa dipere, mme ba mmolaela hona teng.
16. Jwale, Jehojada a hlaba selekane mahareng a hae le setjhaba le morena, hore e fela e be setjhaba sa Jehova.