2. Erekaha ke o phahamisitse, ka o ntsha leroleng, ka o bea modisa wa setjhaba sa ka sa Iseraele, mme o ile ka mehlala ya Jeroboame, wa sebisa setjhaba sa ka sa Iseraele, ke tle ke halefiswe ke dibe tsa bona.
3. ke tla hlakola Baesha le lesika la hae, ke etse ka ntlo ya hao, jwalokaha ke entse ka ntlo ya Jeroboame, mora Nebathe.
4. Mora wa Baesha ya shwelang hae o tla jewa ke dintja; ya shwelang naheng o tla jewa ke manong a lehodimo.
5. Haele taba tse ding tsa Baesha, le tseo a di entseng, le matla a hae, ha ke re, di ngodilwe bukeng ya ditaba tsa ho phela ha marena a Iseraele?
6. Baesha a ntoo orohela ho bontatae, a patwa Thirtsa, mme mora hae, Ela, a busa tulong tsa hae.
7. Lentswe la Jehova la tla jwalo ka moporofeta Jehu, mora Hanani, hodima Baesha le ntlo ya hae, ka baka la bobe boo a bo entseng mahlong a Jehova, kamoo a kileng a mo halefisa kateng ka mesebetsi ya matsoho a hae, a le jwaloka ba ntlo ya Jeroboame, a mo halefisitse le ka ho e timetsa.
8. Ka selemo sa mashome a mabedi a metso e tsheletseng sa Asa, morena wa Juda, Ela, mora Baesha, a qala ho busa Iseraele a le Thirtsa, a busa ka dilemo tse pedi.
9. Yaba mohlanka wa hae Simri, molaodi wa makoloi a mang a hae, wa mo fetohela. Ela o ne a le Thirtsa, a ntse a enwa, a tahwa ka tlung ya Artsa, molebedi wa ntlo ya hae e Thirtsa.
10. Simri a kena, a mo hlaba, a mmolaya, e le ka selemo sa mashome a mabedi a metso e supileng sa Asa, morena wa Juda; yaba o busa tulong tsa hae.
11. Ha e se e le morena, a dutse teroneng ya hae, a bolaya bohle ba ntlo ya Baesha, a se ke a siya le a mong wa ba batona, leha e le bahabo, leha e le metswalle ya hae.
12. Ke ka mokgwa o jwalo Simri a timeditseng ntlo yohle ya Baesha, jwalokaha Jehova a ne a boleletse Baesha ka moporofeta Jehu.
13. E ne e le ka baka la dibe tsohle tsa Baesha, le tsa mora hae Ela, tseo ba sitilweng ka tsona, ba ba ba sebisa le Baiseraele, ba halefisa Jehova, Modimo wa Iseraele, ka diketso tsa bona tsa bosawana.
14. Haele taba tse ding tsa Ela le tsohle tseo a di entseng, ha ke re, di ngodilwe bukeng ya ditaba tsa ho phela ha marena a Iseraele?
15. Ka selemo sa mashome a mabedi a metso e supileng sa Asa, morena wa Juda, Simri a qala ho busa, a busa tshiu tse supileng Thirtsa.Ke ha setjhaba se ne se lwantsha Gibbethone wa Bafilesta.
16. Setjhaba se lwantshang Gibbethone, eitse ha se utlwa ho thwe: Simri o fetohetse morena, o mmolaile tsatsing lona leo, Baiseraele bohle ba diahelong ba bea Omri, molaodi wa makgotla, e be morena wa Iseraele.