1. Kamora tseo, Davida a fenya Bafilesta, a ba kokobetsa, mme a amoha Bafilesta Gathe le metsana ya naha ya teng.
2. A hlola le Bamoabe, mme Bamoabe ya eba bafo ba Davida, ba mo ntshetsa lekgetho.
3. Davida a hlola le Hadaresere, morena wa Tsoba pela Hamathe, ha a ne a ya hloma borena ba hae pela noka ya Eufrate;
4. Davida a hapa makoloi a hae a sekete se le seng, le bapalami ba dikete tse supileng, le ba maoto ba dikete tse mashome a mabedi. Davida a kgaola mesifa ya maoto a dipere tsa makoloi kaofela, a ipolokela tsa makoloi a lekgolo feela.
5. Yaba Basiria ba Damaseka ba tla, ba re ba tlatsa Hadaresere, morena wa Tsoba; Davida a bolaya Basiria ba dikete tse mashome a mabedi a metso e mmedi.
6. Davida a ntoo bea balebedi naheng ya Siria ya Damaseka, mme Basiria ya eba bafo ba Davida, ba mo ntshetsa lekgetho. Jehova a nna a boloka Davida jwalo hohle moo a yang.
7. Davida a hapa dithebe tsa kgauta tse neng di le ho bahlanka ba Hadaresere, mme a ya le tsona Jerusalema.
8. Hape, Davida a nka metseng ya Hadaresere, Thibhathe le Kune, koporo e ngata haholo, eo Salomone a kileng a etsa letsha la koporo le ditshiya le dipitsa tsa koporo ka yona.
9. Eitse ha Thou, morena wa Hamathe, a utlwa hoba Davida o hlotse makgotla wohle a Hadaresere, morena wa Tsoba,
10. a romela mora hae Hadorame ho morena Davida ho ya mo dumedisa le ho mo leboha, kamoo a lwantshitseng Hadaresere kateng, a bileng a mo hlotse; hobane Hadaresere o ne a lwantsha Thou kamehla. Hadorame a tlisa diphahlo tse mefutafuta ya kgauta le ya silefera le ya koporo.
11. Morena Davida a di kgethela Jehova, hammoho le silefera le kgauta tseo a neng a di hapile ditjhabeng tsohle, e leng ho Edomo, le Moabe, le bana ba Ammone, le Bafilesta, le Amaleke.
12. Abishai mora Tseruja, a qhala Baedomo Thoteng ya Letswai, e le batho ba dikete tse leshome le metso e robileng meno e le mmedi.
13. A bea balebedi Edomo, mme Baedomo bohle ya eba bafo ba Davida. Jehova a nna a boloka Davida jwalo hohle moo a yang.
14. Davida ya eba morena wa Baiseraele bohle, mme a nna a etsa setjhaba sa hae kaofela ka ho loka le ka bokgabane.
15. Joabe, mora Tseruja, e ne e le molaodi wa makgotla; Josafate, mora Akilude, e ne e le mmoloki wa mangolo a mmuso;
16. Tsadoke, mora Akitube, le Abimeleke, mora Abiathare, e ne e le baprista; Shavsha e ne e le mongodi;
17. Benaia, mora Jehojada, e ne e le molaodi wa Bakerethe le Bapelethe; bara ba Davida bona e ne e le ba kapele ho ba bang pela morena.