16. O tla a olosa, a ye le moya, sefefo se a hasanye; empa thabo ya hao e tla ba Jehova, kganya ya hao e be Mohalaledi wa Iseraele.
17. Mafutsana le basenyehi ba batla metsi, mme a hlokahala; maleme a bona a omeletse ke lenyora. Nna, Jehova, ke tla ba utlwa; nna Modimo wa Iseraele, nke ke ka ba tlohela.
18. Ke tla hlahisa dinoka maralleng, didiba di phunyehe diphuleng; ke tla fetola naha e tshehla matsha, naha e omeletseng e tlale didiba tsa metsi.
19. Ke tla medisa kedare naheng e tshehla, le leoka, le mirte, le mohlwaare; ke hlome kiprese naheng e omeletseng, e mele hammoho le pine le fire;
20. ba tle ba bone, ba tsebe, ba lemohe, ba elellwe kaofela hoba letsoho la Jehova le entse dintho tseo, le hoba Mohalaledi wa Iseraele ke yena moetsi wa tsona.
21. Hlahisang nyewe ya lona, ho bolela Jehova; le tlise ditaba tsa lona, ho bolela Morena wa Jakobo.