BIBELE e Halalelang

Esaia 32:1-12 BIBELE e Halalelang (SSO61SO)

1. Bonang, morena o tla busa ka ho loka, mahosana le wona a dise ka ho loka.

2. E mong le e mong wa bona o tla ba jwaloka tshireletso ha moya o foka, jwaloka lehaha ha sefefo se etla, jwaloka molatswana wa metsi naheng e omileng, le jwaloka moriti wa lefika le phahameng naheng e nyorilweng.

3. Mahlo a ba bonang ha a sa tla tutubala, ditsebe tsa ba utlwang di tla mamela.

4. Dipelo tsa ba potlakang di tla lokela ho utlwisisa, leleme la ya kokotletsang le bue ka hlalosetso.

5. Molotsana ha a sa tla bitswa motho ya hlomphehang, mothetsi a ke ke a bitswa motho ya bokgabane.

6. Hobane molotsana o bolela tsa bolotsana feela, pelo ya hae e neetswe bobe, a tle a etse bolotsana, a sebe Jehova ka dipuo tsa bohata, a beelle moya wa ya lapileng tlala, a time ya nyorilweng seno.

7. Haele mothetsi, dibetsa tsa hae ke tsa bolotsana, o loha mano ho timetsa mosenyehi ka dipolelo tsa leshano, leha taba tsa mohloki e le tse lokileng.

8. Empa motho ya kgabane o rera tsa bokgabane o phehella tsa bokgabane.

9. Tsohang, lona basadi ba iketlang, le utlwe lentswe la ka! Lona baradi ba itshepang, le mamele dipolelo tsa ka!

10. Ho tla feta selemo se le seng se nang le matsatsi a mang, le ntoo tsieleha, lona ba iketlileng, hobane ho kgolwa ha merara ho tla ba siyo, ho ke ke ha kotulwa le ditholwana.

11. Tsohang, baiketli! Thothomelang, baitshepi! Lahlang dikobo tsa lona, le hlobole, le itlame matheka ka lesela le mahwashe!

12. Ho tla itetwa difuba ka baka la dirapa tse kgahlisang, le ka baka la merara e behang haholo!