23. lesoba la kobo le hare ho yona le ne le le jwaloka lesoba la seaparo sa bahlabani; mmenong wa lesoba ho ne ho ena le moqhaka o tshophilweng o potang kahohle, hore kobo e tle e se ke ya taboha.
24. Melekeng ya kobo, ha etswa mohomo wa digaranata tsa purepera, le sekarelata, le krimsone, e lohilweng.
25. Ha etswa le dikolokonyana tsa kgauta e hlwekileng; dikolokonyana tsena tsa bewa dipakeng tsa digaranata, melekeng ya kobo, ho e potoloha dipakeng tsa digaranata;
26. ha bewa kolokonyana le garanata, hape kolokonyana le garanata, melekeng ya kobo ka nqa tsohle, tsa ho etsa tshebetso, jwalokaha Jehova a ne a laetse Moshe.
27. Yaba ho etswa dikojwana tsa lene e ntle, tse lohilweng, e le tsa Aarone le bara ba hae;
28. ha etswa le moqhwele wa lene e ntle, le dikatiba tsa kgabiso tsa lene e ntle, le marikgwana a lene e ntle e lohilweng;
29. le senyepa sa lene e ntle e lohilweng le purepera, le sekarelata, le krimsone, ka mokgwa wa mesebetsi e homilweng, jwalokaha Jehova a ne a laetse Moshe.
30. Hape, ha etswa lebenyane la kgauta e hlwekileng la moqhwele o kgethehileng; ha ngolwa ho lona lengolo la tiiso le reng: Kgalalelo ho Jehova;
31. la hokelwa ka kgole ya purepera, hore le bewe moqhweleng, kahodima wona, jwalokaha Jehova a ne a laetse Moshe.
32. Tsohle tsa tshebetso ya tabernakele, e leng tente ya pokano, tsa phethwa jwalo, mme bana ba Iseraele ba etsa ka tsohle tseo Jehova a di laetseng Moshe; ba etsa jwalo.
33. Yaba Moshe o tlisetswa tabernakele, le tente le mesebetsi yohle ya yona, le dikgoketsane tsa yona, le dipolanka tsa yona, le maballo a yona, le ditshiya tsa yona, le didulwana tsa yona;
34. le sekgurumetso sa matlalo a dipheleu a tlotsitsweng ka bofubedu, le sekgurumetso sa matlalo a diqibi, le lesira le homilweng le kgaolang;
35. le areka ya bopaki le mejaro ya yona, le sekwahelo,
36. le tafole, le mesebetsi yohle ya yona, le mahobe a pontsha;
37. le kandelare ya kgauta e hlwekileng ka dilampi tsa yona, e leng dilampi tse lokiseditsweng yona, le mesebetsi yohle ya yona le ole ya ho bonesa;
38. le aletare ya kgauta, le ole ya setlolo le dibano tse monko o monate, le lesela le homilweng la monyako wa tente;
39. le aletare ya koporo le rostere ya koporo ya yona, le mejaro ya yona le mesebetsi yohle ya yona; le morifi le sedulwana sa wona;
40. le masela a lepeletseng a lebala, le ditshiya tsa lona, le didulwana tsa lona, le lesela le homilweng la monyako wa lebala, le mehala ya lona, le dithakgisa tsa lona, le mesebetsi yohle ya tshebetso ya tabernakele, le ya tente ya pokano.
41. Ha tliswa le diaparo tsa tshebetso tsa ho sebetsa sehalalelong, e leng diaparo tse kgethehileng tsa Aarone moprista, le diaparo tsa bara ba hae tsa ho etsa mosebetsi wa boprista.