20. Haele dithakgisa tsa tabernakele le tsa lebala lohle, tsa etswa ka koporo.
21. Ke yona palo ya mesebetsi ya tabernakele, e leng tabernakele ya bopaki, e entsweng ka taelo ya Moshe; ya eba mosebetsi wa Balevi, ba laelwa ke Ithamare, mora Aarone, moprista.
22. Haele Betsaleele, mora Uri, mora Hure, wa leloko la Juda, a etsa tsohle tseo Jehova a di laetseng Moshe,
23. a ena le Oholiabe, mora Akisamake, wa leloko la Dane, e le sebetli, le seqapi, le sehomi se homang ka purepera, le sekarelata, le krimsone, le lene e ntle.
24. Haele kgauta kaofela e keneng mosebetsing, e leng mosebetsi wohle wa sehalalelo, ke ena: Kgauta ya kabelo e tsokoditsweng ya eba talenta tse mashome a mabedi a metso e robileng mono o le mong tse nang le dishekele tse makgolo a supileng a mashome a mararo, ha ho uwa ka shekele ya sehalalelo.
25. Haele silefera ya bohle ba phutheho ba badilweng, ya eba ditalenta tse lekgolo le nang le dishekele tse sekete se nang le makgolo a supileng a mashome a supileng a metso e mehlano, ha ho uwa ka shekele ya sehalalelo;
26. ya eba beka bakeng sa e mong le e mong, halofo ya shekele, ha ho uwa ka shekele ya sehalalelo, bakeng sa bohle ba badilweng, ho tloha ho ba dilemo tse mashome a mabedi le ho ya pele, ba etsa dikete tse makgolo a tsheletseng a metso e meraro tse nang le makgolo a mahlano a mashome a mahlano.
27. Ka ditalenta tsa silefera tse lekgolo, ha tshollwa didulwana tsa sehalalelo le didulwana tsa lesira: Ha etswa didulwana tse lekgolo ka ditalenta tse lekgolo, sedulwana se seng ka talenta e le nngwe.
28. Ka dishekele tse sekete se nang le makgolo a supileng a mashome a supileng a metso e mehlano, ha etswa dipekere tsa ditshiya, ha manehwa dihlooho tsa tsona, mme ditshiya tsa kgabiswa ka dithupa.