1. Yaba re a kgutla, ra nyoloha ka tsela ya Bashane. Oge, morena wa Bashane, a tswa le setjhaba sa hae kaofela, a tla re kgahlanyetsa Edrei ka ntwa.
2. Jehova a re ho nna: Se mo tshabe, hobane ke mo neetse matsohong a hao, yena le setjhaba sa hae kaofela, le naha ya hae, o tle o etse ka yena kamoo o entseng kateng ka Sihone, morena wa Baamore, ya neng a ahile Heshbone.
3. Jehova, Modimo wa rona, a neela matsohong a rona le yena Oge, morena wa Bashane, le setjhaba sa hae kaofela, mme ra ba bolaya, ho se ke ha phonyoha le a mong wa batho ba hae.
4. Motsotsong oo, ra nka metse yohle ya hae; ha ho motse oo re sa kang ra o hapa; ra nka metse e mashome a tsheletseng, naha yohle ya Argobe, ke ho re, mmuso wa Oge, morena wa Bashane.
5. Metse eo yohle e ne e teetswe hare ke marako a malelele, e na le menyako le mekwallo, ho sa balwe metse e mengatangata e se nang marako.
6. Ra e neela anathema, jwalokaha re ne re entse ka Sihone, morena wa Heshbone; ra neela metse yohle hammoho le banna le basadi le bana anathema.
7. Ra mpa ra ikgapela makgomo wohle le thepa ya metse.
8. Ka mokgwa oo, mohlang oo, ra amoha marena a mabedi a Baamore naha e mose o kwana ho Jordane, ho tloha nokaneng ya Arnone, ho isa thabeng ya Hermone.