1. Locutus est Dominus ad Moysen in deserto Sinai anno secundo, postquam egressi sunt de terra Ægypti, mense primo, dicens :
2. Faciant filii Israël Phase in tempore suo,
3. quartadecima die mensis hujus ad vesperam, juxta omnes cæremonias et justificationes ejus.
4. Præcepitque Moyses filiis Israël ut facerent Phase.
5. Qui fecerunt tempore suo, quartadecima die mensis ad vesperam, in monte Sinai. Juxta omnia quæ mandaverat Dominus Moysi, fecerunt filii Israël.