1. Tunc cecinit Moyses et filii Israël carmen hoc Domino, et dixerunt : Cantemus Domino : gloriose enim magnificatus est,equum et ascensorem dejecit in mare.
2. Fortitudo mea, et laus mea Dominus,et factus est mihi in salutem :iste Deus meus, et glorificabo eum :Deus patris mei, et exaltabo eum.
3. Dominus quasi vir pugnator,Omnipotens nomen ejus,
4. currus Pharaonis et exercitum ejus projecit in mare :electi principes ejus submersi sunt in mari Rubro.
5. Abyssi operuerunt eos ;descenderunt in profundum quasi lapis.
6. Dextera tua, Domine, magnificata est in fortitudine :dextera tua, Domine, percussit inimicum.
7. Et in multitudine gloriæ tuæ deposuisti adversarios tuos :misisti iram tuam, quæ devoravit eos sicut stipulam.