56. Wannan shi ne farin cikina,In yi biyayya da umarnanka.
57. Kai kaɗai nake so, ya Ubangiji,Na yi alkawari in yi biyayya da dokokinka.
58. Ina roƙonka da zuciya ɗaya,Ka yi mini jinƙai kamar yadda ka alkawarta!
59. Na yi tunani a kan ayyukana,Na yi alkawari in bi ka'idodinka.
60. Ba tare da ɓata lokaci ba,Zan gaggauta in kiyaye umarnanka.
61. Mugaye sun ɗaure ni tam da igiyoyi,Amma ba zan manta da dokarka ba.
62. Da tsakar dare nakan farka,In yabe ka saboda hukuntanka masu adalci.